بالله قلـي يـا زمـان المهزلـه يــا محـتـرم
شاللي بقى من عالمك .. قلـي وانـا بستوعبـه

علمتني كل الدروس .. وقلـت لـي كـل الحكـم
لكنـك أخفيـت الحقايـق .. وأبتلعـت الأجوبـه

أما أنـت كـذاب وردي .. والا أنـا مـا افتهـم
واحد من الاثنين فينا .. ما وثـق فـي صاحبـه

لو تلتفت يـا سيـدي وتشـوف تاريـخ الامـم
ما قلت لي ان الزمـن هـذا .. جهـاد وتجربـه

هذا الزمن ما يعشقـه ويعيـش فيـه الا الصنـم
ما تقـدر تميـز غثـاه .. وبلبلـه مـن عقربـه

أختلطـت الاوراق فيـه وصـار بالـوادي قمـم
حتى الصغيّـر يـا زمـن قـام يتفاخـر بشنبـه

فيه الردي أصبح مهم .. ويحتـرق فيـه الاهـم
عالم من الكذب الرخيص ..وعالـم مـن الاتربـه

الوقت يلعب لعبته .. والذيب هـاب مـن الغنـم
معذور ذيبك يا زمن .. لـو جـاه طفـل وهيبّـه

بيـت يهـدده الضيـاع وتنشـرى فيـه الذمـم
لاعاد تشره يا زمـن لـو جـاه ضيـف وخربّـه

والظلم .. قلي من بقى فـي هالزمـان ولاانظلـم
والا انت خايف تظلم الظالـم .. وتدخـل مكتبـه

اليا متـى نوخـذ لحـم .. ونـرد مافينـا لحـم
ياللي بنيت من العظـام البيـض سلـمّ واعتبـه

لاصار طيبك يا زمـن عـن الـردى مـا ينقسـم
ليه نتعـذب يـا زمـن فـي هالنفـوس الطيبـه

لو فيك خير .. ان كان ما وزعت كلمـة والنعـم
وخليتهـا بيـن الخلايـق تنعطـى مثـل الهبـه

ولو المراجل نتشـرى وتبـاع فـي حبّـة خشـم
ماشفت لـك حـر يصيـد وعزتـه فـي مخلبـه

ولو كل من حدّه زمانه بـاع صوتـه .. وانطـرم
ما بيّـن الأبـداع بالدنيـا .. وشفنـا الموهبـه

كم خلّد التاريخ من مبـدع .. وكـم خلّـد أسـم
شيّـب بـراس العالميبـن وراح محـدٍ شيـبّـه

للحين راسخ فـي جبيـن الذاكـره مثـل الهـرم
ماتقـدر الدنيـا ولا التاريـخ يـقـدر يشطـبـه

واليوم جا مـن غيّـر الأفكـار فـي جـرة قلـم
يكتب .. ولكن للأسف مـا يفهـم اللـي يكتبـه

يلهث ورى طرد السراب وعايـش بدنيـا الوهـم
ويستغرب ان النـاس هـذي كلهـا تستغربـه !!

عنيد .. ما يرضـى يطيـع ويقتنـع انـه قـزم
يصدق اللـي صفقـو لـه .. والصـدوق يكذبـه

لله درك يـا زمـان ان كـان هـذا اللـي حكـم
وخليتنـا فـي خدمـتـه ونلمـعـه ونهـذبـه

عطيته اللقمة ولكن صـار فـي حلقـك .. عظـم
غص .. وتفضل ما عصرته في يدينـك وأشربـه

اليا انكسر قوس الحريب .. اش فايدة هذا السهم ؟
واليا انكشف ستر العذارى .. وش تفيد الأحجبه ؟

الليل يسري وأنت يـا سـاري حزيـن ومنصـدم
أسهرت عينـك والـدروب اللـي تبيهـا متعبـه

هيا انسجم مع زمانك .. طيع شـوري وانسجـم
واليـا بغيـت تعاتبـه .. خـل القصيـد يعاتبـه

الوقت لو يسمع كـلام النـاس مـا جـار وظلـم
لكنهـا مـن عصـر أبونـا آدم وهـي متقلبـه

الوقت هو الوقت .. والمحظوظ من خـاف وسلـم
كـم واحـد ٍ قبلـك تحـداه الزمـان .. وغيبّـه


كلمات راقت لي

ودي لقلوبكم نقره لتكبير أو تصغير الصورة ونقرتين لعرض الصورة في صفحة مستقلة بحجمها الطبيعي