وإذا يعني تضايقنا..!!

[% نورس المحيط %]

السلام عليكم ورحمة الله وبركاته



واذا يعني تضايقنا..؟
بنغير شي.؟
وإذا مات الزهر في أجمل حدايقنا
بنغير شي.؟؟
واذا بهدومنا ضقنا.!
بنغير شي..؟
كثير نمر في بعض الأحيان بضيقة بالــ..
زعل صاحب
وحاجة مال
شتيمة شخص مايعرفك..؟
وعتب قارئ..!
ونزعل حيييل ونتضايق..؟
(.. واذا يعني تضايقنا..!)



واذا يعني تضايقنا..؟
هي الضيقة بتكون الحل..!
إذا كانت شموس الوقت تحرقنا
هي الضيقة بتكون الظِلّ..!!
إذا غابوا جميع الناس وتفارقنا
هي الضيقة بتكون الخِلّ.!!
(وإذا يعني تضايقنا..!؟)



واذا يعني تضايقنا..!
وكثير من التعب ذقنا
وسهرنا الليل
بيجي صبح ويفرقنا
ونبكي سيل
لين الدمع يغرقنا
ولابه شخص في الدنيا بليا..هم
أحد ضايق..!
سبب فاتورة النقال
أحد ضايق..!
عشر سنين متزوج وربك مارزقه عيال
أحد ضايق..!
لأنه البيت به صج وزحام أطفال
أحد ضايق..!
من السكر..!
وأحد ضايق.!
لأنه مامعاه ريال
هموم أكثر من اللازم تخنقنا
سؤال الحال..!!!!!!!!
(وإذا يعني تضايقنا.؟)



وإذا يعني تضايقنا..!
من اللاشي
إلى اللاشي
على اللاشي
تخانقنا
وندخل في نوايا الناس
أظنّ فلان يقصدني..!
أظنّ السيدة فلانة تسب الآنسة فلانة
عشان العانسة فلانة
(أظنّ الناس هنا بالحيل تكرهني..!)
ترانا ناس فينا كذب.
وغبي منهو يصدقنا..
( وإذا يعني تفارقنا..!)



وإذا يعني تضايقنا..!
إذا راحوا
وخلونا
نسوا كل الكلام العذب
بكونا
وعرفنا بيوم بأن كل الحكايه كذب
ملونا
وإذا خيّم علينا الليل
ما أشرقنا
وإذا ضقنا
وصار الحرف حبال في مشانقنا
بعد هذا.؟
(وإذا يعني تضايقنا..!)



وإذا يعني تضايقنا..!
إذا هذا الزمن لبسك ثياب في يوم مو قدك
بتحط ايدك على خدك
وتبكي حيل
إذا هذا البحر ضيق ولا يقدر يمدك
بتحط ايدك على خدك
وتبكي حيل
إذا خدك طبع حزنه على يدك
وعرفنا كل شي
(وإذا يعني تضايقنا!)



إذا يعني تضايقنا..!
وطفينا دروب النور
وعتمنا
المدن والدور
ويتمنا
شجر وزهور
وكتمنا
رقيق شعور
وشتمنا
علو السور
عشان أشياء في الأتفه
من الأتفه من الأشياء..!
رجل خاين
"ماهي دوم الرجال تخون..!"
خيانة بنت
"ماهي كل البنات تخون..!"
(وإذا يعني تضايقنا!)



وإذا يعني تضايقنا..!
ومشوا عنّا كثير أصحاب
وتفارقنا
وشققنا الورق للريح
بعض فرقا
تكون الحل قبل نطيح
بعض فرقا
مثل جمره وحنا الشيح
بعض فرقا
كثير أكرم من التجريح
بعض فرقا
تجي جية دعا تسبيح
وكثير أصحاب فارقنا ونسيناهم
كأن كانت علاقتنا علاقة وقت..!
مصالح وانتهت ..
يمكن
قراب و دم أو جيران
يمكن
تشابه هم
يمكن
واللي يهم
ماضقنا .
(وإذا يعني تضايقنا..!)



وإذا يعني تضايقنا..!
وطيرنا فراش النوم
ومسحنا كل ألوانه
وإذا سيطر على جوك حزن ووجوم
وبديت تفسر الأشياء على كيفك
كثير أشياء غلط حولك
وجوع الناس
تعبانة
قلق مدري طفش مدري تعب مدري قرف
مدري ترف
مدري من الناس زهقانة
كثير أشياء
تزهقنا
(وإذا يعني تضايقنا..!)

بنغيّر شي.؟




مما راق لي