ما معنى الصداقة

[لولوه محمد]

بسم الله الرحمن الرحيم
تسلمي يعسل على الموضوع
الصداقه من اسمى المعاني لمن الواحد يقول صديقي يعني هوا الي يفك عني ضيقي
هوا الي يشاركني افراحي واحزاني هوا الي ياخد بيدي اذا الناس شالوا اياديهم هوا الي احس بالراحه معا لمن اتكلم لان اعرف ان مهما قلت راح يفهمني وادا غلط راح يعدرني هدا الصديق
اما الفرق فهناك فرق كبير
الصاحب هوا الي بيني وبينه بس سلام ومزح وضحك واتصالات من فترة لفتره لكن ماتقدري تدي الامان ولا اسرارك لانك ماتعرفي والصاحب ممكن يسير صديق لكن الصديق يوصل لمرحله اخرى مرحلة الاخوه
اما الصديق الي 24 ساعه معاكي وكل صغيره وكبيره عنك عنده حتى تفاصيل حياتك اليوميه
يعرفها حتى الفطور والغداء والعشا يعرفه
وبعدين الصاحب لمن يجي يزورك لازم تستعدي وتتشيكي وترتبي البيت وتجيبي عشا من بره وتسوي رسميات مال امها داعي
اما الصديق لمن يجي يزورك ما يحتاج تتشيكي انزلي ببجامتك وكشتك والسلام ولا جيتي تعشي سويله اندومي وراح يشوفها مضبي هدا ادا ما جا هوا بالبجامه كمان
الصاحب محد يعرفه غير الام والاب وامكن كمان مايعرفوا
اما الصديق القبيله كلها تعرفوا دا ادا ماسار واحد من القبيله
اكيد مو اي احد اتخده صديق لان الناس اجناس في الوفي وفي الغدار وفي البخيل وفي الكريم وفي الكداب وفي الصادق
اكيد لازم في البدايه اختبره وقبل دا كله التوفيق من الله و((الطيبون للطيبات والخبيثون للخبيثات))
لمن تقولي صديق يعني الثقه لان لو مابينك وبين صديقك او صديقتك الثقه ماراح تكون صديقه من الاساس
اكيد في اصدقاء لازم توقفي عندهم لان الزمن بيختلف والناس بيختلفوا مع الزمن فافضل شي الواحد يحتفظ باصحابه القدامه لان مافي زيهم انتي تعرفيهم وهما يعرفوكي
والله احيانا يكون عندك اخ صديق واحيانا يكون عندك صديق اخ وارجع واقول التوفيق من الله
لا طبعا ما احط صديقي في اختبارات بس في البدايه لان اختبارات الدنيا كثيره وهيا كافيه انها تبين صدق صداقته
وعلى قولت امي الله يرحمها ((الله يعز ايام الشدايد إلي علمني عدوي من صديقي))
الله لا يكتبها على مسلم وباذن الله مافي صديق يخون صديقه لان الخيانه ماتجي من الصديق ولكن تجي من الشخص الي يمثل انه صديقك عشان يوصل لمبتغاه